Студентска листа, која освои 140 од вкупно 250 пратенички места, има мнозинство за самостојно формирање влада. Саичиќ вели дека меѓу кандидатите за пратеници и надворешните соработници има доволно стручни луѓе за избор на новите министри.
Во првите 30 дена новата власт планира да обезбеди стабилен курс на динарот, редовна исплата на платите и пензиите и сигурно снабдување со нафта, гас и електрична енергија. Предвидени се и разговори во Вашингтон за санкциите против Нафтената индустрија на Србија (НИС), како и во Москва за долгорочен договор за снабдување со гас.
Во првите 100 дена ќе следуваат усвојување на буџетот за 2027 година, преиспитување на големите јавни проекти, реорганизација на државните институции и претпријатија и воведување професионално управување.
Саичиќ најави и објавување на договорите за големите државни инвестиции, истраги за корупција и затворање на фирмите што незаконски стекнале привилегирана положба, како и враќање на незаконски стекнатиот имот на функционерите и партиските финансиери. Имотот најпрво би бил замрзнат до завршувањето на постапките. Тој откри и дека меѓу кандидатите на Студентската листа има 160 доктори на науки, а пратениците и по конституирањето на парламентот ќе продолжат тесно да соработуваат со претставниците на студентското движење.
Како една од најважните задачи ја издвои истрагата за уривањето на настрешницата на Железничката станица во Нови Сад, при што загинаа 16 лица.
„Првото и најважно од почетните студентски барања беше истрага и кривично гонење на одговорните. Но до денес ништо не е направено, а истрагата активно се попречуваше. На тоа му дојде крајот: истрагата ќе се води многу поефикасно, ќе се утврдат фактите и ќе се поведат постапки против обвинетите“, изјави Саичиќ.
Тој порача дека чесните службеници во државната администрација немаат причина за страв, но дека високите функционери ќе мора да одговараат за своите постапки. Најави и прекинување на практиката со години да се назначуваат вршители на должноста, како и редовни јавни конкурси за раководните позиции.
Саичиќ ги отфрли стравувањата дека идеолошките разлики во студентското движење ќе предизвикаат внатрешни судири. Според него, членовите на листата ги обединуваат владеењето на правото, борбата против корупцијата, слободата на медиумите и економскиот развој.
За претседателскиот кандидат на движењето, рече тој, ќе одлучуваат самите студенти. Односите меѓу идната влада и претседателот на државата мора да останат во рамките на уставните надлежности.
Саичиќ откри и дека Студентска листа веќе има подготвена програма на повеќе од 1.200 страници, на која работеле десетици стручњаци од различни области. Програмата предвидува конкретни и мерливи цели за обновување на институциите и реформи на државниот систем.
Извор: МКД.мк
