Земјотресот што пред две години на денешен ден ја погоди Јапонија бил толку силен што неговите ефекти се почувствувале во вселената, соопшти Европската вселенска агенција – ЕСА.
Научниците велат дека земјотресот со јачина од 9 степени според Рихтеровата скала што на 11 март 2011 ја погоди Јапонија пренел звучни бранови низ атмосферата што ги забележал истражувачкиот сателит „Goce“ (Gravity field and steady-state Ocean Circulation Explorer).
Ова откритие е објавено во магазинот „Геофизички истражувања“. Исклучително чувствителната опрема на сателитот регистрирала промена на 255 километри од земјата, пренесува BBC.
Одамна е познато дека силните земјотреси може да произведат акустични бранови со ниска фрекфенција или инфразвуци, кои човековото тело не може да ги регистрира, но ниту едно вселенско летало во орбитата, до сега, не регистрирало такви бранови.
Во Јапонија денеска ќе биде одбележана двегодишнината од разорниот земјотрес и цунами кои што однесоа над 15 000 животи.
