Албин Курти и Вјоса Османи за помалку од три години на власт го вратија Косово 10 години наназад, обвини експремиерот на земјата и претседател на Алијансата за иднината на Косово – Рамуш Харадинај, откако САД го ислкучија Косово од воената вежба „Бранител – Европа 2023“ поради тоа што Приштина не се консултирала со нив за акциите во северно Косово и не одговорила на апелите за деескалација на тензиите.
Премиерот Курти и претседателката Османи, според Харадинај, не оставиле ниту еден успех непревртен наопаку.
„Исклучувањето на Косово од НАТО вежбата ‘Бранител – Европа 2023 (Defender Europe 2023) e аларм за нашата национална безбедност. Мора да си многу кусоглед за да станеш непријателски настроен кон целиот демократски свет во вакво деликатно време“, критикува Харадинај.
„Земјите со децении инвестираат да формираат пријателства и алијанси. Во нашиот случај, се појави Албин Курти и се обидува да ги сруши. Имало и други во нашата историја кои сакале да ги срушат овие сојузи, но Косово беше поголемо од нив и триумфираше. Косово нема избор освен и овој пат да триумфира.
Луѓето од Косово, кои се најпрозападни на континентот, ќе знаат како да ги заштитат нивните пријателства и да го задржат курсот. Албин Курти е премал за да ја смени насоката на Косово и неговиот народ.
Тој има само една шанса да направи нешто добро за Косово еднаш во неговиот живот – негова оставка денес!“, порача Харадинај на Фејсбук.