Еден од главните „first world“ проблеми е кога келнерот нема да ти го донесе тоа што си го порачал. Е па, еден јапонски ресторан проработи баш на тој принцип.
Се работи за „Ресторанот на погрешни нарачки“ кој пробно ги отвори вратите во Токио од 2 до 4 јуни. За да не се случи да го добиете нарачаното, келнерскиот персонал е составен исклучиво од лица со деменција.
Целта е да се промени перцепцијата кон луѓето кои патат од оваа болест, и да се развие емпатијата и разбирањето кај останатите.
Блогерката Мизухо Кудо, на пример, пишува дека го посетила ресторанот и порачала хамбургер, а добила „gyoza“ кнедли. И била воодушевена, ем од искуството, ем од кнедлите.
Планот е да се отвори уште еден ваков „pop-up“ ресторан во септември, за да се одбележи Светскиот ден на Алцхајмеровата болест.
Од друга страна, ова звучи како идеално место за сите што се неодлучни во нарачките и често посакуваат да можат на келнерот да му речат: „Донеси ми нешто. Било што“.
