Цел возен парк со луксузни олдтајмери, од кои неколку исклучиво ретки модели, бил пронајден неодамна на еден имот во западна Франција.
Како што пренесуваат француските медиуми, под купот стари весници и хартии биле сокриени 60 автомобили, произведени во периодот меѓу 1930 и 1970 година.
„Беше еднакво возбудливо колку влегување во гробницата на Тутанкамон“ – раскажал Матје Ламур, директорот на аукциската куќа „Арткиријал Мотокарс“.
Прекриени со прашина, отпад и полжави кои некако се нашле во внатрешноста на самите возила, овие „гаражни убавици“ меѓу кои легендарната Tалбот Лаго T26 од 1948 г., една од трите преостанати Масерати во светот A6G Gran Sport од 1956, и Ферари 250 Калифорнија од 1961, чиј сопственик одреден период бил францускиот актер Ален Делон, се дел од колекцијата на извесен Роже Бајон, страстен љубител на автомобили.
„Целејќи кон тоа да отвори музеј за автомобили на својот имот, тој купувал луксузни модели во Франција и ширум Европа“, додал Ламур.
Бајон во меѓувреме банкротирал, а неговата драгоцена колекција останала со децении сокриена од јавноста. Автомобилското богатство кое со години го собирал било откриено дури после смртта на неговиот син.
Колекцијата е проценета на 16 милиони евра, а легендарните автомобили, од кои неколку заслужуваат да се најдат во музејските колекции, ќе бидат продадени на аукција која ќе се одржи на 6 февруари во Париз.
