Највисоките свештени лица на афро-кубанската религија Сантерија, познати како балалави, предупредиле денес, на нивниот традиционален новогодишен ритуал, дека 2014-та година ќе биде година на болести, уништување на животната средина, растурени семејства и судири меѓу луѓето и државите кои би можеле да прераснат во војни.
Претставувајќи го “Годишното писмо”, извештајот на својата религиска група по мистериозниот новогодишен ритуал со верско пеење и жртвување на кокошка, коза и други животни, балалавите исто така предвиделе дека во оваа година ќе починат многу значајни политички и верски лидери. Сепак, не навеле ниту едно име.
Свештениците порачале дека меѓусебното разбирање, соработка и единство се клуч за стабилна иднина, како на Куба, така и насекаде во светот.
“Дојде време младите да се отворат пред постарите, а старите да ги прифатат со раширени раце…Дијалогот е единственото решение за овој свет”, порачал еден од основачите на “Годишното писмо”, Лазаро Квеста.
Сантеријската религија е комбинација од католицизам и африканската традиција Јоруба, а нејзините свештеници го објавуваат “Писмото” секоја година околу 1. јануари.
Американската агенција наведува дека пророштвата во главно се неодредени, но некогаш се случува да бидат точни.
Минатиот јануари, свештениците ја предвиделе смртта на Чавез, како и немирите во Египет и Сирија.
