Најголемата затворена скијачка патека во светот беше отворена во петокот во Шангај, по најтоплиот август во Кина во последните 60 години, земјата обвинета дека е најголемиот испуштач на таканаречените стакленички гасови во светот.
Во форма на глечер и со површина од речиси 100.000 квадратни метри, „L*SNOW Indoor Skiing Theme Resort“ се наоѓа на час и половина од центарот на Шангај, во областа Пудонг. Во внатрешноста, скилифт, жичница и мал воз ги превезуваат посетителите на четирите скијачки патеки.
„L*SNOW Indoor Skiing Theme Resort“ во петокот беше потврден од Гинисовата книга на рекордите како најголем затворен скијачки центар во светот, пред Харбин, којшто исто така се наоѓа во Кина. Првично планирано за 2019 година, отворањето беше одложувано неколкупати.
Од 9 часот наутро температурите во Шангај достигнаа 30 степени на плоштадот уреден во алпски стил каде се одржа свеченото отворање, но кога гостите влегоа во комплексот живата падна значително под нулата. Во оваа земја во којашто населението сè повеќе е вљубено во зимските спортови, посетителите ги заменија очилата за сонце и маиците со скијачки комбинезони.
И покрај континуираните рекордни температури, силната владина поддршка и зголемениот интерес на средната класа за зимските спортови ја поттикнаа кинеската скијачка индустрија, особено откако Пекинг беше домаќин на Зимските олимписки игри во 2022 година. Кина е светски лидер во скијање во затворен простор, со половината од најдобрите 10 во светот, според шангајската компанија „Daxue Consulting“.
„Порано немаше скијачки центри околу Шангај и немаше начин да тренирам во текот на летото. Затоа, јас сум прилично среќна“, изјави за AFP Синтија Џанг, сноубордерка пред да се упати кон патеките.
Во август, извештајот на локалните власти во Шангај потврди дека овој вид проекти „неизбежно ќе потроши многу енергија“. Но, тие нагласија дека новиот комплекс, кој беше свечено отворен во петокот, е изграден со цел да се максимизира повторната употреба на енергијата, особено благодарение на системот за складирање мраз и искористување на отпадната топлина, како и големите фотоволтаични објекти на покривите.
