По повод 80-годишнината од спасувањето на околу 50.000 бугарски Евреи од заканата за депортација во нацистичка Германија за време на Втората светска војна, денеска во Скопје беше проектиран филмот „49.172“.
Филмот ја следи драматичната приказна за спасувањето на бугарските Евреи, раскажана од преживеаните сведоци на настаните.
На проекцијата присуствуваше и Амбасадорот на Република Бугарија во земјава, Ангел Ангелов.
Како што посочи тој, во филмот станува збор за сите спасени Евреи од страна на Бугарија, и притоа изрази задоволство што добриот чин на земјата бил преточен во видео. Овој „историски добар акт на државата кон Евреите треба да биде пример за солидарност, емпатија и толеранција за во иднина“, рече Ангелов.
На филмот беа претставени архивски документи, филмска и аудио архива. За снимањето на „49.172“, авторите добиле пристап до владините и приватните архиви во Соединетите Држави, Израел и Бугарија, вклучувајќи ги и музејот на Стивен Спилберг и Музејот на холокаустот Јад Вашем во Ерусалим.
Филмот е бугарско-израелско-американска продукција на режисерот Пламен Петков и продуцентот Атанас Колев. Сценарист е професорот Владимир Игнатовски.
Извор/Фото: МИА
