Mинистерката за финансии Нина Ангеловска, во три наврати си исплатила државна помош за својата фирма Вебспот, фирма регистрирана за интернет трговија, обвинува ВМРО-ДПМНЕ.
Портпаролот на партијата – Наум Стоилковски, денес на прес-конференција истакна дека постојат сериозни сомневања дека Ангеловска „повторно ја злоупотребила својата позиција“ со тоа што од државниот буџет, за кој што беше задолжена да го управува, сама на своја фирма си исплатила државна помош за плати во време на епидемијата.
„Фирмата Вебспот во сопственост на Нина Ангеловска на 08.07.2020 година земала 210.909 денари, на 12.06.2020 земала 224.750 денари и на 19.05.2020 земала 224.750 денари, од помошта од антикризните мерки за време на епидемијата од Ковид-19. Односно вкупно околу 600.000 денари“, обвини Стоилковски, и ја повика Антикорупциската комисија да отвори предмет за случајот, апелирајќи антикорупционерите да бидат храбри без оглед дали постои или не притисок врз нив.
„Одговорност за Нина Ангеловска мора да има. Институциите мора да реагираат зошто ова е начинот како се трошеле парите една милијарда евра пари кои граѓаните ќе треба да ги враќаат со години. Ова е втора злоупотреба во низа на Нина Ангеловска, откако јавноста дозна дека навреме ги извадила своите 250.000 евра од пропаднатата банка Еуростандард банка, афера тешка 200 милиони евра, банка зад која стојат непокриени кредити исплаќани кон струмички фирми блиски до Зоран Заев. Законите мора да почнат да важат за сите. Одговорност мора да има“, рече Стоилковски.
