– Владите вршат шпионажа преку апликации за мобилни телефони, а особено преку известувањата испратени преку нив, предупреди денеска американски сенатор, без да именува конкретни земји.
Во писмо до Министерството за правда на САД, сенаторот Рон Вајден наведува дека странски претставници побарале податоци од Гугл, чија матична компанија е Алфабет и Епл. Иако во писмото не се навлегува во многу детали, се укажува на друг можен начин државата да ги следи мобилните телефони.
Мобилните апликации се потпираат на известувања за да ги информираат мобилните корисници за дојдовните пораки, најнови вести и други ажурирања. Тоа е и звучен сигнал и известување на екранот што корисниците го добиваат кога имаат нова е-пошта или кога нивниот омилен тим штотуку победил, наведуваат американски медиуми. Често луѓето не сфаќаат дека сите такви известувања одат преку серверите на Гугл и Епл. Ова им дава на двете компании ретка можност да го следат целиот проток на информации од соодветните апликации до претплатниците и ги става „во уникатна позиција да им олеснат на разузнавачките агенции во добивањето информации за апликациите што едно лице ги користи“, се вели во писмото на Вајден.
Тој го повикува американското Министерство за правда да ги „укина или измени сите можни политики“ кои спречуваат јавна дискусија за темата шпионирање преку насочени известувања. „Епл“ соопшти дека писмото на сенаторот Вајден им дало „зелено светло“ што им е потребно за јавно да објават повеќе детали.
„Во врска со овој случај, американската федерална влада ни забрани да споделуваме какви било информации“, се вели во соопштението на компанијата. „Сега кога овој механизам за следење стана јавен, ја ревидираме нашата политика за транспарентност за да одговориме на прашањата“, додадоа од Епл.
Во писмото на Вајден се наведува за „поднесена директива“ како извор на информациите за шпионирање преку известувањата за притискање на апликацијата. Тимот на сенаторот не навлезе во детали за тоа кој ја поднел директивата, но извор запознаен со ова прашање потврдил дека странски и американски владини агенции побарале информации до Епл и Гугл барајќи метаподатоци поврзани со известувања.
Изворот одби да ги именува земјите чии влади побарале таква услуга, но рече дека тие се демократски сојузници на САД.
МИА
