„Најголемата опозициска партија во Грција – Нова Демократија, жестоко реагира на константните прекршувања на договорените услови од Договорот во Преспа од страна на Скопје“, пишува грчкиот весник „То Вима“.
„Уште мастилото од потписите на Преспанскиот договор не се исушило, а амбасадорот на Северна Македонија во Европската унија нејзината земја ја нарече ‘Македонија’ за време на официјална подготвителна средба во Заедничкиот парламентарен комитет на ЕУ и Северна Македонија“, изјавила портпаролката на Нова Демократија – Мариа Спираки.
Спираки се пожалила дека амбасадорката Агнеза Руси Поповска, зборувајќи за најавената посета на грчкиот премиер Алексис Ципрас на Скопје, рекла: „Премиерот Алексис Ципрас ќе ја посети Македонија и тоа ќе биде првата посета на грчки премиер на нашата земја“.
Ваквото реферирање кон државата претставува сериозно кршење на Преспанскиот договор, оценува Спираки, која порача дека ќе испрати прашање до Европската комисија.
Имено, „северномакедонските“ (како што ги нарекува „То Вима“) парламентарци идната недела во Стразбур треба да се сретнат со европарламентарците во рамките на Заедничкиот парламентарен комитет, во кој Спираки е редовен член.
Прашањето на Спираки ќе гласи:
„Во рамки на подготвителната средба на Заедничкиот парламентарен комитет на ЕУ и Северна Македонија во Брисел, амбасадорот на Северна Македонија – Руси Поповска, за време на размената на ставови со членовите на комитетот, неколкукратно го користеше името ‘Македонија’ при реферирањето кон Република Северна Македонија, и тоа во присуство на членовите на Генералниот директорат на Комисијата за преговори со соседите и преговорите за проширување.
Во еден пример, таа рече, цитирам: ‘Премиерот Ципрас ќе ја посети Македонија, што ќе биде првата билатерална посета на грчки премиер на нашата земја’.
Имајќи предвид дека со имплементацијата на Преспанскиот договор официјалното име на државата за сите употреби е ‘Република Северна Македонија’ или ‘Северна Македонија’, ја прашуваме Комисијата:
Дали употребата на терминот ‘Македонија’ од официјалните претставници на Северна Македонија се смета за соодветна имплементација на Преспанскиот договор, особено во присуство на членовите на на Генералниот директорат на Комисијата за преговори со соседите и преговорите за проширување?“, пренесува „То Вима“.
