Големо свлечиште се активираше вчера на регионалниот пат Новаци – Маково, во близина на депонијата Мегленци, целосно го блокираше коловозот и го исфрли патот од функција. На видеото што кружи на социјалните мрежи може да се види како земјата пропаѓа, а асфалтот скоро целосно е „проголтан“ од свлечиштето.
Според првичните информации, среќна околност е тоа што во моментот на активирањето на свлечиштето на патот немало возила, што ја исклучи можноста за повредени или жртви. Градоначалникот на Општина Новаци, Стевче Стевановски, во своето вчерашно обраќање до јавноста нагласи на сериозната опасност по безбедноста на овој регионален пат. Тој информираше дека веднаш по инцидентот, на терен излегле екипи од РЕК Битола и јавниот претпријатие за одржување на патиштата, кои работат на итна санација на повредата и стабилизирање на теренот.
Овој инцидент повторно ја отвора загриженоста за состојбата на земјиштето и инфраструктурата во поширокото подрачје. Имајќи предвид дека пред околу три недели беше забележана колосална пукнатина во атарот на Липково, каде што беше открито активно свлечиште, што претставуваше директна закана за локалното население. Тогаш, жителите побараа од надлежните итна реакција за запирање на ерозијата и спречување на потенцијална катастрофа.
Надлежните служби најавуваат дека дополнителни информации за состојбата на патот Новаци – Маково и мерките кои ќе се преземат ќе бидат објавени по комплетна проценка на ризикот и стабилноста на теренот. Додека тоа не се случи, апелот до граѓаните е да го избегнуваат овој патен правец и да користат алтернативни рути.
