Утрешниот ден, деветти јуни, на Меѓународниот театарски фестивал „Војдан Чернодрински“ ќе биде посветен на Авторот во фокус – Горан Стефановски. Ќе се презентираат сите актуелности поврзани со зачувувањето на ликот и делото на Горан Стефановски во македонската култура.
Ќе бидат одржани пет работилници, освен презентацијата на едукативната програма: Работилницата за драмско пишување што ќе ја води Ана Трпеноска, Работилницата за новинарско следење на фестивал што ја води тимот на Умно.мк, Работилница за тело – говор – простор што ја води Искра Шукарова и Работилницата за костимографија што ја води Александар Ношпал.
Ќе бидат одржани и промоции на повеќе изданија од театарска и театролошка литература од македонски и странски автори, а ќе бидат активни сите фестивалски зони од минатата година, како и нови кои ќе се откриваат постепено во текот на следните денови на фестивалот.
Фестивалот започна вчера со изведбата на „Хеда Габлер“ во режија на Васил Христов, во продукција на Драмскиот театар од Скопје. Овогодинешното мото на фестивалот е „Промени се, промени сè“.
Вкупно 11 претстави во продукција на националните театри и пет претстави во придружната програма ќе бидат одиграни до 14 јуни во Прилеп, обединети под концептот „Ново читање“ што ги опфаќа двете потпрограми: „Новото читање на драмите од авторот во фокус – Горан Стефановски“ и „Ново читање на класиците“.
