Нема докази за поврзаност помеѓу употребата на мобилниот телефон и зголемениот ризик од рак на мозокот, според новиот преглед на достапни објавени докази ширум светот нарачан од Светската здравствена организација, објави агенцијата Ројтерс.
И покрај огромниот пораст на употребата на безжичната технологија, нема соодветно зголемување на инциденцата на рак на мозокот, покажа прегледот, објавен во вторникот. Тоа важи дури и за луѓето кои остваруваат долги телефонски повици или оние кои користат мобилни телефони повеќе од една деценија.
Конечната анализа опфати 63 студии од 1994-2022 година, оценети од 11 истражувачи од 10 земји, вклучително и Дирекцијата за заштита од радијација на австралиската влада.
Истражувањето ги проценуваше ефектите на радиофреквенцијата, која се користи во мобилните телефони, како и во ТВ, монитори за бебиња и радари, рече на студијата коавторот Марк Елвуд, професор по епидемиологија на рак на Универзитетот во Окленд, Нов Зеланд.
„Ниту едно од главните испитувани прашања не покажа зголемени ризици“, рече тој. Прегледот ги разгледа ракот на мозокот кај возрасните и децата, како и ракот на хипофизата, плунковните жлезди и леукемијата, како и ризиците поврзани со користењето мобилни телефони, базните станици или предавателите, како и професионалната изложеност. Другите типови на рак ќе бидат пријавувани посебно.
Прегледот следи друга слична работа. СЗО и другите меѓународни здравствени тела претходно изјавија дека нема дефинитивен доказ за негативни здравствени ефекти од радијацијата што ја користат мобилните телефони, но повикаа на повеќе истражувања. Во моментов е класифициран како „можно канцероген“ или класа 2Б, од страна на Меѓународната агенција за истражување на ракот (IARC), категорија што се користи кога агенцијата не може да ја исклучи потенцијалната врска.
Советодавната група на агенцијата повика класификацијата да се преиспита што е можно поскоро со оглед на новите податоци од нејзината последна проценка во 2011 година.
Оценката на СЗО ќе биде објавена во првиот квартал од следната година.
Преземено од Рацин.мк
