Иако секој септември секој зборува за ајвар, се чини дека годинава акцентот е ставен на старите рецепти. Се пребаруваат стари готвачи, се вадат тетратките на бабите и се инсистира на докажани начини на подготовка. Рецептот за македонски ајвар е токму еден од тие.
Рецепт за ајвар:
– 10 кг црвен пипер
– 5 кг модар патлиџан
– 1 л масло
– 1 голема лажица шеќер
– сол по вкус
Подготовка:
Измијте ги пиперките и испечете ги во рерна или на рингла. Откако ќе се испечат, ставете ги во најлонски кеси неколку минути за да омекнат, што ќе го олесни лупењето. Кога малку ќе се изладат, излупете ги.
Потоа ставете ги пиперките во цедалка најмалку 3 часа да се исцедат. На ист начин испечете ги модрите патлиџани, а целиот процес повторете го како и со пиперките. Кога ќе се исцедат пиперките и патлиџаните, сомелете ги во рачна мелница за месо. Потоа сè заедно префрлете во поголемо тенџере во кое ќе го готвите ајварот и ставете го на тивок оган.
За време на готвењето потребно е постојано да ја мешате смесата, а маслото да се додава постепено, по еден децилитар на секои 20 минути. Постојано мешајте бидејќи маслото не смее да крене на површина.
Поминете со лажицата преку дното на тенџерето, доколку го видите дното на тенџерето тоа е знак дека ајварот е готов. Додадете сол и шеќер на самиот крај, односно во последните 20 минути од готвењето, притоа постојано пробувајќи го ајварот.
Додека се готви ајварот, потребно е да ги подготвите теглите така што ќе ги измиете, стерилизирате и добро исушите.
Кога ќе го истурите ајварот во тегли, покријте го со крпа да отстојат 24 часа. Потоа врз секоја ставете малку масло, врзете и затворете со капаци и чувајте ги на ладно и темно место.
