Во топол летен ден, многу луѓе сонуваат за леден десерт. Ви предлагаме нетипична комбинација – замрзнат чизкејк со боровинки.
Уште повеќе, предлагаме веганска верзија на класичниот чизкејк кој користи индиски ореви наместо маскарпоне или намаз со сирење и кокос крем наместо шлаг.
Не треба да го печете овој чизкејк – секоја компонента се подготвува во добар блендер или сецкач за зеленчук, а најтешкиот дел од целиот процес е да се чека десертот да замрзне.
Состојки:
250 гр индиски ореви
150 гр бадеми
150 гр урми
100 гр боровинки
100 гр крем од кокос
2 лажици кокосово масло
2 лажици јаворов сируп / мед
1 лажичка екстракт од ванила
½ лимон
Подготовка:
Индискиот орев ноќта пред да го подготвите десертот потопете го во вода или кратко сварете го во топла вода околу 10 минути за да омекне.
Направете ја основата за чизкејкот: бадемите сомелете ги во ситен прав и измешајте ги со урмите. Добиената леплива смеса притиснете ја во плех калап кој претходно сте го обложиле со хартија за печење. Ставете во замрзнувач да се стегне.
Направете го кремот за чизкејк: исцедете ги натопените/варени индиски ореви и измешајте ги во крем заедно со кокосовиот крем, кокосово масло, јаворов сируп, екстракт од ванила и свежо исцеден сок од половина лимон.
Пробајте го кремот. Ако не ви е доволно слатко – додадете уште јаворов сируп (или мед).
Прелијте ја смесата врз замрзнатата основа, а одозгора додадете ги боровинките.
Сè заедно вратете го во замрзнувач околу еден час да се стегне.
Вака приготвениот замрзнат чизкејк може да го чувате во замрзнувач до два месеци. Исечете го на помали парчиња и уживајте по желба. Добар апетит!
