Камењата во жолчката се стврднати наслаги на калциум и холестерол кои може да се движат по големина од зрно песок до топче за голф. Оние кои неодамна имале операција за слабеење, како што е операција на гастричен бајпас, и оние кои се на нискокалорична диета за слабеење се изложени на зголемен ризик за жолчни камења. Жените имаат двојно поголем ризик од мажите. Други фактори на ризик вклучуваат возраст (над 40 години), земање апчиња за контрацепција, семејна историја на жолчни камења и одредени здравствени состојби како што се дебелина, дијабетес и цироза.
Повеќе од 80 проценти од луѓето со жолчни камења немаат симптоми, но ако камењата го блокираат протокот на жолчката во тенкото црево, тие можат да предизвикаат болка во жолчното кесе после јадење и други симптоми. А тие симптоми може да бидат:
Абдоминална болка
Камењата во жолчката предизвикуваат спазам на жолчното кесе ако се заглават додека патуваат во горниот дел од тенкото црево. Најчесто се чувствува како остра болка во горната десна страна на абдоменот која може да трае половина час или подолго и често не реагира на лекови против болки. Жолчното кесе се активира кога јадеме мрсна храна, а нападите често се случуваат после јадење, обично навечер.
Гадење и повраќање
Чест симптом е интензивното гадење кое може да доведе до повраќање. Тоа е честа појава после јадење и може да биде знак за посериозни компликации како што се апендицитис и инфекција. Гадењето и повраќањето може да траат неколку часа.
Треска
Нападот може да биде придружен со блага треска, што укажува на инфекција или воспаление на жолчното кесе. Повисоката температура укажува на посериозна состојба.
Жолтица
Освен за камења во жолчката, жолтицата може да биде знак и за други проблеми со црниот дроб. Може да биде цироза или хепатитис.
Ненадејно губење на тежината
Дебелината го зголемува ризикот од формирање на жолчни камења, а брзото губење на тежината може дополнително да го зголеми. Како што одеднаш губите тежина, црниот дроб произведува жолчка со висока содржина на холестерол, што може да го поттикне развојот на жолчни камења.
