Без разлика дали веќе имате остеопороза или сакате да го намалите ризикот од развој на остеопороза, постојат одредени совети кои треба да ги знаете.
Остеопорозата, тивкиот непријател на здравјето на коските, може значително да влијае на квалитетот на животот, особено кај постарите лица, а почесто кај жените. Иако најмногу се поврзува со генетиката и возраста, исхраната игра важна улога во превенцијата и лекувањето на оваа состојба, велат нутриционистите.
Доколку не внесувате доволно храна со витамини и протеини може коските да бидат изложение на ризик од ниска минерална густина која може да доведе до остеопороза.
Протеини: Истражувањата покажуваат дека недоволниот внес на протеини го зголемува ризикот од ниска минерална густина на коските и дека постарите луѓе кои следат диета богата со протеини имаат тенденција да имаат помал ризик од фрактури.
Калциум: Калциумот е потребен за формирање на ново коскено ткиво, а негови најдобри извори се јогуртот, сирењето, зелениот лиснат зеленчук, гравот, јаткастите плодови и семките.
Витамин Д: Без доволно витамин Д, телото не може правилно да го апсорбира калциумот, но за жал неговиот недостаток е исклучително чест. Всушност, околу 50 отсто од светската популација има недостаток на овој витамин, особено во зима, поради помалата изложеност на сонце. Витаминот Д е концентриран само во неколку извори на храна, како што е масна риба, така што суплементацијата е едно можно решение.
Магнезиум: На телото му е потребен магнезиум за одржување на здравјето на коските, а доколку не внесувате доволно преку исхраната, ризикот од остеопороза се зголемува. Покрај тоа, способноста на телото да одржува оптимални нивоа на овој минерал опаѓа со возраста. Можете да го најдете во храната како грав, спанаќ, бадеми, семки, банани, темно чоколадо…
Витамин К: Витаминот К е од суштинско значење за функцијата на протеините вклучени во формирањето и одржувањето на коските. Витаминот К1 го има во зелениот лиснат зеленчук како спанаќот и кељот и растителните масла, додека витаминот К2 е концентриран во животинските производи како сирење и пилешко, како и во ферментирана храна.
Витамин Ц: Витаминот Ц е важен антиоксиданс кој го спречува распаѓањето на коските, а ниските нивоа се поврзани со намалена минерална густина на коските. Храна богата со овој витамин се агруми, бобинки, пиперки и брокула.
Цинк: Цинкот е потребен за правилен раст и одржување на здравјето на коските, а помага и во нивната регенерација. Добри извори на цинк се морските плодови, јаткастите плодови, живината и леќата, додека дополнувањето со цинк може да го забрза заздравувањето на коските по фрактура.
За здравјето на коските потребни се и минералите калиум, бор, силициум, селен, железо и манган. Дополнително, некои истражувања сугерираат дека дополнувањето со омега-3 масни киселини и колаген може да им помогне на луѓето со ниска минерална густина на коските и остеопороза.
Медитеранската исхрана, која е богата со зеленчук, овошје, мешунки, јаткасти плодови и риба, може да го намали ризикот од фрактури и остеопороза, како и да ја одржи коскената и мускулната маса.
