Војната во Украина доведе до најтешката криза во односите на Москва со САД по Студената војна. Русија вчера соопшти дека Западот си игра со оган размислувајќи да ѝ дозволи на Украина да нападне подлабоко во Русија со западни ракети
Руското Министерство за надворешни работи соопшти дека им забранило влез во земјата на 92 американски државјани, вклучително и новинари, адвокати и раководители на клучни воено-индустриски компании, поради, како што го нарече, русофобичен став на Вашингтон.
Војната во Украина доведе до најтешката криза во односите на Москва со САД по Студената војна. Русија вчера соопшти дека Западот си игра со оган размислувајќи да ѝ дозволи на Украина да нападне подлабоко во Русија со западни ракети.
Списокот што министерството го објави на комуникациската платформа Телеграм содржи 14 вработени во „Волстрит журнал“, петмина новинари на „Њујорк тајмс“ и четворица на „Вашингтон пост“.
Трите медиуми не одговорија веднаш на барањето на Ројтерс за коментар.
Министерството соопшти дека забраната се однесува на уредниците и известувачите на „водечките либерално-глобалистички публикации“ вклучени во производството и ширењето на „дезинформации“ за руските вооружени сили.
Тие додадоа дека забраната е одговор на „русофобната насока“ на администрацијата на американскиот претседател Џо Бајден, а како клучни ги истакнаа опсежните санкции наметнати на руските политичари, претприемачи, научници и новинари.
„Ги потсетуваме актуелните американски власти за неизбежноста на казната за непријателски дејствија, без разлика дали тоа е директно поттикнување (на украинскиот претседател Володимир Зеленски) и неговите следбеници на акти на агресија и терористички напади или обиди за мешање во внатрешните работи на Руската Федерација“,
соопшти руското МНР.
