191
Момче од Велика Британија кое боледува од тешка форма на епилепсија, стана првиот пациент на кој му е вграден уред во черепот за да ги потисне нападите. Оран Ноулсон (13) има синдром Ленокс-Гасто, форма на епилепсија отпорна на стандарден третман, а невростимулаторот кој хируршки бил вграден му ги намалил дневните напади за 80 отсто, јавува Би-Би-Си.
Момчето разви епилепсија кога имало три години и оттогаш му е дијагностициран аутизам и хиперкинетичко нарушување (АДХД).
Неговата мајка, Џастин, рече дека нападите на Оран биле многу чести, а тој често имал повеќе од сто серии дневно, кои вклучуваат паѓање на земја, губење на способноста за дишење и реанимација.
Оран е вклучен во проектот „CADET“, односно серија испитувања кои ја проценуваат безбедноста и ефективноста на длабоката мозочна стимулација за тешка епилепсија.
Овој проект беше развиен од болницата „Great Ormond Street“, Универзитетскиот колеџ во Лондон, болницата „Kings College“ и Универзитетот во Оксфорд.
Нападите на епилепсијата се активираат од абнормална електрична активност во мозокот, а целта на овој уред е да ги запре или прекине абнормалните мозочни сигнали.
Операцијата, која траела околу осум часа, била извршена во октомври 2023 година.
Семејството на момчето вели дека е свесно дека ова не е лек за епилепсија, но се надеваат дека ќе го подобри квалитетот на животот на Оран, пишува Би-Би-Си.
