Работилница за stand-up комедија
Менторка: Миранда Лончар (БиХ)
Stand-up комедијата е жанр кој првенствено се потпира на реторичките вештини на изведувачите. Општо прифатено е дека реториката може да се научи. Во античко време, реториката била еден од главните училишни предмети. Па, ако може да се научи реторика, тогаш е можно да се научи како да се биде stand-up комичар. Сега, учењето како да се користат алатките на реториката и вештините потребни за stand-up изведба не е ниту брзо ниту претерано едноставно, но луѓето кои сакаат да го прават тоа генерално имаат голема желба, а токму оваа страст е најголемиот гарант на успехот.
Оваа работилница, ако ви е полесна, можете да ја замислите како работилница за јавно говорење, а тие вештини се многу барани и всушност корисни за секого. Сепак, работилницата првенствено ќе се занимава со конкретна подготовка и изведба на stand-up настапи. Целта на работилницата е да им даде на учесниците привидно искуство на stand-up комичар. Заинтересираните учесници може да ја добијат препорачаната литература на англиски јазик во pdf формат пред почетокот на работилницата. Исто така, можно е претходно да се подготви текстот и да се испрати до менторката на работилницата за тие да дојдат на работилницата со веќе подготвен текст. Клучен дел од работилницата е импровизиран настап со микрофон, на сцена, пред публика составена од други учесници. Ако не се обидеш, никогаш нема ни да знаеш.
Соберете храброст, пријавете се, и пишете ни. И, ајде, да учиме, да грешиме и да се смееме заедно!, велат организаторите.
Миранда Лончар (р. 1976) доаѓа од Мостар, БиХ. Таа се занимава со stand-up комедија од 2008 година, а коментарите се дека ѝ оди добро во последните неколку години. Сака глупав хумор, но сепак да има некоја порака. Ја сака секоја публика, а омилена ѝ е онаа која гласно се смее: луѓе кои ширум ја отвораат устата, неоптоварени со својот изглед во моментот на напад на смеа. Комедијата во живо е игра на заведување за двајца, така што на крајот на вечерта и публиката и изведувачот се разголуваат низ смеа. Таа блискост ја возбудува г-ѓа Лончар, барем малку, затоа што веќе со години е во брак.
