Гласањето за расправата за „ублажувачките“ амандмани на контроверзните членови од Законот за авторски права, кој веројатно ќе го видоизмени интернетот каков што го знаеме, пропадна за само пет гласови. Апсурдното во целата работа е што всушност имало доволен број пратеници за резултатот да биде сосема обратниот. Арно ама, како што велат самите, несакајќи погрешно гласале.
Европскиот парламент го изгласа контроверзниот Член 13, со кој се заоструваат правилата за почитување и заштита на авторските права (copyright) на интернет. Во вторникот, со 317 гласа „за“ и 312 гласа „против“, ЕП ја отфрли расправата за амандманите кои можеа да ги ублажат или целосно отфрлат двата спорни члена во Законот. Со тоа се овозможи да се гласа за целиот закон, кој помина со 348 гласови „за“ и 274 „против“. Но, по гласањето, 13 од пратениците испратиле корекција на своето гласање, со образложение дека сакале да гласаат „за“ расправа за амандманите, а не „против“, како што реално гласале.
Според правилата на ЕП, членовите можат да пријават корекција на својот глас, но без можност тоа да влијае на исходот на веќе завршеното гласање. Пратеничката Маријете Шаке многу брзо укажа на „недоразбирањето“:
People corrected their votes on the record, which does not change the end result, but does reveal there would have been a majority for voting on amendments if MEPs would have voted as they later indicated they would have #copyright https://t.co/fg00XfkEhI
— Marietje Schaake (@MarietjeSchaake) March 26, 2019
Сите 13 членови рекле дека немале намера да гласаат на начинот на кој гласале. 10 од нив инсистираат дека сакале да гласаат во полза на амандманите. Двата пратеници на Шведската демократска партија, кои се меѓу овие кои објавиле корекција на своето гласање, соопштија дека притиснале погрешно копче. Од партијата велат дека нивните членови биле збунети од промената во редоследот на гласањето во текот на сесијата.
„Денеска имавме три гласања за Законот за авторски права. На едно од гласањата притиснавме погрешно копче – на гласањето за редоследот по кој ќе гласаме. Да поминеше, ќе можевме да гласаме за бришење на спорниот член. Тоа го сакавме“, велат во соопштението.
Меѓутоа, дел од луѓето се скептични дека е можно европратениците да направат ваков пропуст.
„Не сум толку сигурен. Сосема очекувам некои пратеници да гласаат како што навистина сакале да гласаат, само за потоа во записите да стои корекција со сосема спротивната опција – само за да можат да речат дека згрешиле, но подоцна се поправиле, со што би ја избегнале одговорноста од начинот на кој гласале“
I am not as certain as you are. I fully expect some MEPs to vote the way that they really wanted, just to later change the records to the other choice – to be able to say that they did wrong but later changed it, as a way to get away with how they voted.
— Magnus Andersson Ⓟ (@Moinois) March 26, 2019
