Италијанскиот генерал порачал дека КФОР има „видливо и флексибилно присуство низ Косово“ и дека е добро подготвен да реагира на сите релевантни безбедносни настани
Заменик-командантот на КФОР, бригадниот генерал Федерико Бернака денеска разговарал со претставници на партијата на косовските Срби, Српска листа (СЛ), при што посочил дека мисијата е „добро подготвена да реагира на сите важни безбедносни случувања“.
Како што информираат од КФОР, делегацијата на Српската листа ја предводел претседателот на таа партија Златан Елек, а на средбата биле изнесени позиции за најновите безбедносни случувања, вклучително и оние на северот на Косово и загриженоста на Србите по последната акција на косовската полиција, во која беа затворени паралелните структури на Србија во општините со српско мнозинство во северно Косово.
Италијанскиот генерал порачал дека КФОР има „видливо и флексибилно присуство низ Косово“ и дека е добро подготвен да реагира на сите релевантни безбедносни настани.
Бернака ја повторил посветеноста на мисијата да придонесе за безбедноста и стабилноста „за сите луѓе кои живеат во Косово, во сите околности и непристрасно, во согласност со долгогодишниот мандат на ОН“.
„Во таа смисла, КФОР продолжува целосно да го поддржува дијалогот меѓу Белград и Приштина, кој се води со посредство на ЕУ. КФОР продолжува да го спроведува својот мандат, врз основа на резолуцијата 1244 на Советот за безбедност на ОН од 1999 година – да обезбеди сигурна и безбедна средина за сите луѓе кои живеат во Косово и слобода на движење, во сите околности и непристрасно“,
се наведува во соопштението на мисијата на НАТО во Косово.
Косовската полиција вчера спровела акција за затворање на објекти користени од паралелни структури управувани од властите во Србија во косовските општини на северот од земјата, населен со мнозинско српско население. Затворени биле српските паралелни структури во четирите општини на северот на Косово – Северна Митровица, Лепосавиќ, Звечан и Зубин Поток.
Постапката на Приштина ја осудија мисијата на ЕУ во Приштина, како и амбасадите на САД, Германија, Велика Британија и Франција.
Реакција има и од НАТО од каде соопштуваат дека се разочарани од вчерашните акции на косовската полиција на северот на Косово, која, како што се наведува, не била координирана со КФОР и покрај повеќекратните ветувања дека тоа ќе го стори.
„Потребна е деескалација и целосен ангажман во дијалогот со ЕУ“,
напиша портпаролката на НАТО, Фара Даклала, на платформата Икс.
Во објавата се наведува и дека КФОР е целосно подготвен да го задржи својот мандат врз основа на Резолуцијата 1244 на Советот за безбедност на ОН за сите заедници на Косово.
Very disappointed at yesterday’s actions in northern Kosovo which were not coordinated w/@NATO_KFOR despite repeated pledges to do so. KFOR is fully prepared to uphold its UN mandate UNSCR 1244 for all communities in Kosovo. Need de-escalation & full engagement in the EU Dialogue
— NATO Spokesperson Farah Dakhlallah (@NATOpress) August 31, 2024
Припадниците на мисијата КФОР утринава формираа кордон на Ибарскиот мост во Митровица со опрема за разбивање на демонстрации. На мостот има засилено присуство на италијански карабинери, а распоредени се и неколку блиндирани возила. На јужната страна на мостот кој го спојува северниот дел на градот населен со мнозинство Срби, и јужниот дел населен со мнозинство Албанци има и неколку возила и припадници на КФОР.
