Пол Александер, познат во целиот свет како „Полио Пол“, почина на 78 години. Тој е познат по тоа што 70 години живееше во направата наречена „железни бели дробови“ (официјален Гинисов светски рекорд), заболен од болеста полио.
Пол се заразил со вирусната болест летото 1952 година, кога имал шест години и останал парализиран од вратот надолу. Итно бил префрлен во болница во Тексас – и се разбудил во металниот цилиндар каде што ќе го мине остатокот од својот живот.
Но, тоа не го спречило Пол да заврши колеџ, па да стане адвокат и успешен писател. Неговата приказна позитивно влијае на луѓето ширум цел свет, како пример на борец кој долго ќе се помни, велат неговите пријатели.
Според „Зидојче цајтунг“, причина за смртта е последица од зараза со Ковид-19.
Пол Александер сам ги напишал своите мемоари, под наслов „Три минути за куче: Мојот живот во железните бели дробови“ (Three Minutes for a Dog: My Life in an Iron Lung), објавени во април 2020 година. Според „Гардијан“, тој ја пишувал книгата повеќе од осум години, користејќи пластично стапче, тастатура и пенкало, но и со помош на својот пријател Норман Д. Браун, кој бил негов негувател и помошник.
