Претседателот Стево Пендаровски денеска од Тетово повтори дека ќе ги чека конечните верзии на пакетот закони поврзани со изградбата на Коридорите 8 и 10д, по што во консултација со неговиот правен тим ќе одлучи дали ќе ги потпише.
Во врска со вчерашното барање од лидерот на ВМРО-ДПМНЕ да не ги потпишува указите за пакетот закони, Пендаровски рече дека не прима совети од никого, а најмалку од политички партии.
„Кога ќе ги донесат законите во конечна верзија и кога ќе ги изгласаат во Парламентот, тогаш ќе седнеме со мојот правен тим и ќе видиме дали има основа за такво нешто. Инаку, во однос на потпишувањето укази за важење на законите, обично не примам совети од никого, а најмалку од политички партии“, нагласи претседателот на државата, одговарајќи на новинарски прашања по посетата на Универзитетот на Југоисточна Европа.
МИА
