Остатоци од пирамида изградена пред околу 3.700 години се пронајдени близу т.н. „крива пирамида” на фараонот Снефру, соопшти египетското Министерство за антиквитети.
Пирамидата, која е изградена во времето на 13-тата династија, се наоѓа во кралската некропола Дашура, 30 километри јужно од Каиро.
Ископувањето е сé уште во рана фаза, па за големината и обемот на пирамидата уште е рано да се говори.
Во меѓувреме, „Сите најдени делови од пирамидата се во многу добра состојба, и ќе следат понатамошни ископувања за да се откријат повеќе делови“, додаде министерството.
Египет, дом на една од најстарите цивилизации на светот, има 123 (досега откриени) древни пирамиди. Меѓу нив се и славните пирамиди во Гиза, изградени пред околу 4.500 години. Најголема од трите во Гиза е таа на Кеопс, висока 146 метри, и единствената преживеана структура од седумте светски чуда на древниот свет.
