Службениците од тетовското обвинителство сѐ уште работат на предметот отворен поради пожарот во модуларната болница на 8 септември во Тетово, при што животите ги загубија 14 луѓе, соопштија денеска од Основното јавно oбвинителство откако граѓанската иницијатива „Подобро за Тетово“ денеска на прес-конференција реагираше што, и по точно два месеца од големата трагедија, никој не понесе ниту морална ниту кривична одговорност, а јавноста сѐ уште нема одговори на низа прашања.
Од ОЈО потенцираат дека истрагата се уште е во насока на собирање на материјални и вербални докази за утврдување на кривична одговорност.
„Јавните обвинители кои преземаат дејствија во насока на расчистување на причините за пожарот во Модуларната ковид болница во Тетово, интензивно постапуваат. Се очекува во обвинителството да пристигнат извештаите од наредените вештачења, меѓу кои и вештачењето од експертите од Република Германија. Откако ќе се приберат материјалните и вербални докази, обвинителите ќе ги разгледаат и анализираат, ќе биде утврдено дали и каде постои кривична одговорност, по што ќе биде донесена и одлука за натамошниот тек на постапката“, се вели во одговорот на Обвинителството по барање на новинарите од Тетово.
На 5 октомври, Обвинителството објави извештај за причините за пожарот и информираше дека сѐ започнало во моментите кога лекарскиот тим ја започнал реанимацијата на пациентка болна од КОВИД-19, при што се случил краток спој на продолжен кабел.
МИА
