На овогодинешниот Светски мобилен конгрес не го видовме Xperia Z4, но Sony претстави друг долгоочекуван уред – Xperia Z4 Tablet.
Ова е нов high-end таблет, кој е наследник на Xperia Z2 Tablet. Уредот доаѓа со 10,2-инчен IPS дисплеј со резолуција од 2560 x 1600 пиксели.
Таблетот доаѓа со најновиот процесор на Qualcomm – 64-битни 8-core Snapdragon 810 со четири Cortex-A57 јадра. Сликовниот акцелератор е Adreno 430, а оперативната меморија е 3GB.
Остатокот од спецификациите на Xperia Z4 Tablet вклучуваат 32GB внатрешна меморија, 8-мегапикселна Sony ExmorRS задна камера, 5-мегапикселна предна камера, 3G и 4G LTE. Капацитетот на батеријата е 6.000 mAh, со тоа што од компанијата велат дека тој може да издржи 17 часа при видео репродукција. Таблетот е водоотпорен (IP68 сертификат) и издржува до 30 минути до 1.5 метри длабочина.
Xperia Z4 Tablet е со елегантен дизајн, има метална рамка, трајно стакло и неверојатно тенок профил – само 6.1 мм. Неговата тежина е 395 грама, а понудените бои ќе бидат црна и бела. Xperia Z4 Tablet работи со оперативен систем Android 5.0 Lollipop, со тоа што исто така ќе нуди пристап до услугата Xperia Lounge Gold, која обезбедува ексклузивни содржини од филмови, телевизиски серии, музика и апликации.
Sony исто така најави и дополнителни додатоци развиени специјално за Xperia Z4 Tablet. Од нив се Sony BKB50 Bluetooth тастатура, торбичката Sony SRC32 која ќе биде достапна во црна и бела боја и безжичниот Sony BSP60 звучник.
LTE и Wi-Fi моделите на новиот Sony Xperia Z4 Tablet ќе бидат пуштени на пазарот во јуни оваа година, но се уште нема информации за цената на уредите.
