Најновата низа од вулкански ерупции на Исланд може да трае со децении, па дури и со векови, според истражувањето објавено во списанието Terra Nova во средата.
Серијата ерупции започнаа во 2021 година на полуостровот Рејкјанес во југозападниот дел на островот, само 55 километри југозападно од главниот град Рејкјавик.
Голем дел од населението на островот во северен Атлантик живее во погодениот регион. Во него се наоѓа и единствениот меѓународен аеродром и неколку геотермални централи кои ја снабдуваат земјата со топла вода и електрична енергија.
Само од минатиот декември се случија пет големи вулкански ерупции. Лавата се излеа од пукнатините во земјата и проголта некои куќи.
Истражувачите ги анализирале податоците за земјотресите од изминатите три години и ги споредиле хемиските и физичките својства на лавата од различни локации за да утврдат дали доаѓа од истата подземна магматска комора.
Откриле дека навистина се работи за магма со слични петрографски својства. Ова укажува на поврзан подземен систем на магма, напишаа истражувачите. Врз основа на сеизмолошките податоци, тие веруваат дека се работи за умерено голема акумулација на магма на длабочина од приближно девет до 11 километри, а којашто е долга 10 километри. Создадена е помеѓу 2002 и 2020 година.
Тимот истражувачи заклучил дека сегашната серија ерупции би можела да биде почеток на „долготрајна епизода“, но тие не можат да предвидат колку долго ќе трае.
Исланд се наоѓа на местото каде што се раздвојуваат северноамериканските и евроазиските тектонски плочи. Затоа, вулканските ерупции се чести, но ерупциите на вулканите поблиску до центарот на островот обично траат неколку дена или седмици. Ерупциите од пукнатини, од друга страна, може да траат многу подолго.
