„Судот на честа при Лекарската комора на Република Северна Македонија на денешната седница донесе одлука за привремено одземање на лиценцата за работа на д-р Ваљтон Дервиши, специјалист анестезиолог, вработен во ЈЗУ Клиничка болница Тетово. Лиценцата за работа на докторот привремено се одзема за период од 7 години, што согласно правните прописи е максимална казна што може да се изрече за етички прекршок во работењето“, соопштија од Лекарската комора.
Како што се наведува, Судот на честа утврдил дека докторот сторил повреда на Кодексот на медицинска деонтологија на Лекарската комора, како и Меѓународниот кодекс на медицинска етика.
Докторот на медицина, посочуваат, својата професија треба да ја врши совесно и одговорно со почитување на човековото достоинство. Тој е должен да ги почитува и штити правата на пациентите и да ја чува нивната доверба и тајност на медицинските податоци. Почитување на етичките норми е најважната основа на која лекарите секојдневно ги практикуваат своите стручни знаења во областа на медицина и ги лекуваат пациентите, потенцираат тие.
„И најстручниот лекар не е доволно добар лекар доколку не ги почитува етичките норми и правила. Лекарската комора, како професионално здружение на сите доктори на медицина во нашата земја, нема да дозволи дигнитетот и угледот на докторите да бидат загрозени од неодговорно однесување на поединци во фелата. Со денешната Одлука органите на Комората како легитимни претставници на сите нејзини членови испраќаат порака дека лекарите веруваат во етичките вредности и правила и силно ќе се залагаат за нивно доследно почитување во работата“, стои во соопштението од Лекарската комора.
Министерот за здравство Фатмир Меџити, кој пред неколку дена ја најави ваквата одлука, денеска, по донесувањето на истата, изјави дека „од овој момент веќе настапува Обвинителството и судскиот процес“.
Основното јавно обвинителство Тетово поднесе обвинение против анестезиологот и го товари за несовесно работење во службата, како и за неовластено снимање. Според кривичниот законик, за вакво дело се предвидува казна затвор од три месеци до три години.
Извор: МИА
