„Градинарот и смртта“ е насловот на новата книга на еден од најголемите бугарски, европски и светски писатели Георги Господинов.
Веста ја соопшти писателот на социјалните мрежи кој порача дека книгата ќе се појави во книжарниците на 27 август „попладне на годината“.
Според Господинов „Градинарот и смртта“ е неговата најлична книга досега после „Природен роман“ и од кусата порака со која ја најавува, таа е поврзана со неговиот татко.
„Татко ми беше градинар. Сега е градина. Оваа книга нема жанр, треба сами да го изберете. Како што смртта нема жанр. Како животот. Како градината. Роман елегија, роман градина – има ли воопшто тоа значење за ботаниката на тагата.
Историја за заминатите татковци во еден заминувачки свет… За татко ми којшто ги крепеше на рамениците тежините на минатото и не запираше да ги раскажува. Таа Шехеразада – татко ми. Сега минатото се провлекува тивко и се руши врз мене во попладневнињата.
Не книга за смртта, туку за тагата на животот којшто си заминува. Има разлика“.
Така пишува Георги Господинов во најавата за неговата нова книга „Градинарот и смртта“ која во Бугарија излегува како издание на „Жанет 45“.
Георги Господинов (1968) е поет, романсиер и сценарист. Тој е најпреведуваниот бугарски современ писател, чии книги досега се преведени на повеќе од дваесетина јазици. Добитник на бројни награди, меѓу кои и Интренационалниот „Букер“ за преводот на англиски јазик (Анџела Родел) на романот „Засолниште во времето“.
На македонски јазик се објавени: „Природен роман“ (Темплум, Или-Или), збирките раскази „И други приказни“ (Темплум, Или-Или), „И сè стана месечина“ (Или-Или) и „Сите наши тела“ (Или-Или), збирката песни „Балади и распади“ (Блесок), книгата за деца во коавторство со неговата ќерка Раја, „Свадби на животни и нешта“ (Или-Или) и неговите најуспешни романи „Физика на тагата“ (Или-Или) и „Засолниште во времето“ (Или-Или).
Извор: https://racin.mk/vesti/na-27-avgust-izleguva-novata-kniga-na-georgi-gospodinov-gradinarot-i-smrtta/
