Изедначувањето на цените за лекување на странски државјани во земјава се однесува само на оние цени кои ги плаќаат здравствено неосигурените лица во земјава, појаснуваат денеска од Министерството за здравство, откако министерот Фатмир Меџити ја запали јавноста со изјавата дека косовските и албанските државјани ќе можат да се лекуваат во македонското јавно здравство по иста цена со македонските граѓани, сугерирајќи, меѓу редови, и дека косовските државјани не се странци.
„Косовските граѓани плаќаа двојни цени и тоа само во јавното здравство, а не во приватното. Дадовме наредба од Министерството за здравство ова да се израмни и да има исти цени како за државата, бидејќи всушност не доаѓаат странци во Македонија, тие се од Косово, особено за здравствени потреби. Презедов мерки и за граѓаните од Албанија кои доаѓаат и ги посетуваат болниците во Охридскиот регион“, изјави завчера Меџити.
Од МЗ, меѓутоа, појаснуваат дека не се работи за изедначување на цените со оние кои ги плаќаат македонските осигуреници.
„Во врска со ценовникот за давање на здравствени услуги на странци, Министерството за здравство информира дека до сите универзитетски клиники и институти е доставен допис за усогласување на ценовниците за приватни здравствени услуги на странците со граѓаните на РСМ кои се неосигурани и плаќаат приватно. Потенцираме дека воопшто не станува збор за изедначување на цените помеѓу странските државјани и државјаните на РСМ, туку изедначувањето е со приватните пациенти кои не се здравствено осигурени, односно кои не плаќаат здравствено осигурување“, се вели во денешното соопштение од Министерството за здравство.
Оттука, нагласуваат од МЗ, за овие промени не се потребни никакви промени во Законот, бидејќи, како што велат, дел од клиниките и институтите веќе имаа изедначени ценовници, односно еден ценовник за приватни здравствени услуги.
„Со оваа промена на странските државјани се дава право на избор помеѓу јавните и приватните установи, со тоа што се промовира јавното здравство како една достапна ефикасна здравствена услуга во нашата држава конкурентна на пазарот на трудот. Иста е ценатa. Македонските државјани кои што немаат здравствено осигурување ќе плаќаат иста цена со странците, бидејќи се работи за приватна услуга. Тоа значи дека граѓаните кои плаќаат здравствено осигурање во никој случај нема да бидат на каков било начин во подредена состојба да им го плаќаат данокот на странците, државјаните секако партиципација ќе си плаќаат, односно ќе плаќаат поевтино“, велат од Министерството за здравство.
Оттаму додаваат дека ова и порано функционирало во некои државни клиники, а сега со се продолжува иницијативата и за во другите клиники.
