Ако неопходноста е мајка на иновацијата, тогаш недостатокот на простор е татко на добрата архитектура. Фасцинантно е што се може да се постигне кога целите се високо поставени, а желбата доволно силна.
Архитектите од Specht Harpman успешно го трансформирале овој двокатен клаустрофобичен стан на Менхетн во прекрасен простор за живеење на 4 нивоа. Резултатот – станче што изгледа далеку попространо од неговата реална површина од 40 квадратни метри.
Првото ниво вклучува мала бања и целосно функционална кујна. Со цел да се заштеди на простор, кујнската површина е изработена во „wrap-around“ стил: кон дневната соба продолжува во трпезариска маса, а веќе во дневната – има улога на шанк.
Дневната соба го окупира второто ниво од домот и го користи веќе добропознатиот трик – складирачки простор под скалите. Ваквиот дизајн на скалите го прави просторот уреден и простран, а каблите што се протегаат од нив до самиот таван, даваат чувство на континуитет на самиот апартман.
Третото ниво е во форма на внатрешен балкон, а воедно и спална соба со поглед на целата дневна соба под неа. Вклучува уште еден сет од скали, кои водат кон слатка тревна тераса на покривот. Попатно, дополнителни плакари под скалите.
Овој микро-стан во целост го искористува малиот простор што го окупира, балансирајќи меѓу високи празни ѕидови и компактни детали. Белите светли ѕидови и темните подови му даваат на апартманот безвремен, класичен изглед, додека севкупниот амбиент е потполно модерен.
