По повод Меѓународниот ден на младите 12 август, на меѓународниот културен и сценски фестивал Охридско Лето под покровителство на Министерството за Култура, во Охрид на истиот датум 12.08.2017 год. планирана е реализација и изведба на мултимедијален сценски фестивал на младите – СВЕТОТ НА МЛАДИТЕ.
ДЕТСКИ СВЕТ – СВЕТОТ НА МЛАДИТЕ е проектна иницијатива замислена и организирана од Дејан Лилиќ, Центарот за Креативен Развој од Скопје и Арт Вивенди во соработка со Министерството за Култура, Охридско Лето, ЗОО Градината од Скопје, Сојузот на извидниците на РМ, Младинската асоцијација на средни стручни училишта – МАССУМ и средните училишта од РМ – М.Пупин, П.Караѓозов, В.А.Дрен, К.Рацин, И.Н.Луј од Скопје и Ј.Сандански од Струмица…
Во периодот од месец март до средината на месец јуни, 2017 г. извршена е прво широка, па потоа потесна селекција, на некои од најдобрите во моментов, музички, театарски и модни креативни средношколски тимови, арт лидери на РМ. По селекцијата и изборот на претставниците од средните школи следат заедничките работилници и проби со ментори и професионалци, се со цел усовршување на настапите, вештините и тимските способности.
Во моментов тече подготовката на официјалната програма и сценариото на СВЕТОТ НА МЛАДИТЕ и музичките арт презентации на средношколците и нивните тимови пред публиката, по повод Интернационалниот ден на младите 12 август, на фестивалот Охридско Лето.
Програмата на фестивалот СВЕТОТ НА МЛАДИТЕ планирано е да опфати сценска презентација на музичките победници на МАССУМ Образовното рандеву 2017 од повеќе насочени средни училишта од РМ. Настанот ќе да биде поставен на сцената – Долни Сарај во термини одбрани во периодот од 12ч до 17ч на 12.08.17 (сабота).
На сцената пред публиката ќе се претстават во кабаре формат, со свои уметнички точки и дела, некои од најспоменуваните, најнаградуваните и најквалитетните средношколски музички, новинарски и видео тимови од РМ.
Фестивалот, целиот настан, како впрочем и целата подготовка на проектната иницијатива ДЕТСКИ СВЕТ / СВЕТОТ НА МЛАДИТЕ, медиумски комплетно ќе биде промовирана, покриена и презентирана во медиумскиот простор во форма на документарен краткометражен забавен филм, изработен од средношколски новинарски тимови, подржани од професори ментори и координатори.
Замислата и целта на организаторите е ако не на овој, тогаш веќе на следниот Ден на младите, 12 август 2018, покрај најдобрите домашни средношколски арт тимови, на сцената на Охридско Лето да се претстават и креативни тимови од градови од соседството, регионот, ЕУ и пошироко.
Иницијативата СВЕТОТ НА МЛАДИТЕ во своето продолжение веќе следната учебна година ќе ги разгледа аспектите на социјален развој на младите, мирот и безбедноста. Поконкретно, преку широка и повеќеслојна соработка, непрекината комуникација и доедукација на спектри од таргети ќе се цели да се допрат, а воедно и покријат некои од темите, пристапот и предизвиците на социјалната вклученост на младите во однос на промоцијата и одржувањето на мирот и безбедноста.
МЕЃУНАРОДЕН ДЕН НА МЛАДИТЕ 2017
Интернационалниот ден на младите е ден посветен на глобалната свесност за младите.
Како таков е востановен од Обединетите Нации во 1999 година со Резолуцијата 54/120, а од 2000та година обичај е Интернационалниот ден на младите да се прославува во различен дух и со различно мото на секој 12ти август,.
Целта на овој ден е да се нагласи вниманието од потребата за ревидирање на начините како на младите да им се помогне подобро да се прилагодат, доживеат и реализираат себе во современото и модерно општество насекаде низ светот.
Со ревијално прославување на овој ден, 12ти август, секоја година се цели на владите и останатите да им се даде можност да пројават и покажат свесност за потребите на младите ширум светот.
За време на Интернационалниот ден на младите низ светот секоја година под различно мото се организираат многубројни концерти, работилници, културни настани и средби на национално и локално ниво, се со цел подигнување на глобалната свест за проблеми кои ги допираат младите низ реализација на разновидни заеднички проекти на младите со спектри на организации и лица од јавниот сектор.
МЛАДИТЕ ГРАДАТ МИР е слоганот и мотото со кое оваа година Интернационалниот ден на младите 2017 и Обединетите Нации ќе пробаат гласно и на глобално ниво да соопштат и воочат на растечкиот факт на спознание дека младите како носители на промената, се критичните актери во превенцијата на конфликти и одржливоста на мирот.
Со мотото МЛАДИТЕ ГРАДАТ МИР, Интернационалниот ден на младите 2017 ќе го прославува придонесот на младите во превенцијата на конфликти и трансформацијата на општеството, како и инклузијата, социјалната правда и одржливиот мир.
Во време кога младата популација со својата бројност го бележи својот историски максимум, очигледни се податоците дека на глобален план, во земјите и регионите во конфликт, токму младите се најзагрозени и го сочинуваат најголемиот дел од населението во конфликтните зони. Од оваа причина, демографски императив е земањето предвид на потребите и тежнеењето на младите по прашањата за мир и безбедност.
Уште една резолуција на Советот за безбедност, Резолуцијата 2282 (2016) наведува дека степенот и предизвикот на одржување на мирот побаруваат партнерство помеѓу чинителите, вклучувајќи ги и младинските организации. Таа исто така ја потврдува значајната улога која младите може да ја играат при спречувањето и решавањето на конфликти, како и дека се клучен составен дел при обезбедувањето успех како на одржувањето на мирот, така и на напорите за градење мир.
СПИСОК НА МЕНТОРИ И УЧЕНИЦИ ЗА ОХРИД 2017:
СТРУМИЦА
Ментор професор – Катерина Ќосева и Денис Кирчанов
Бенд:
- Ивана Гушева – вокал
- Александар Цамбулев – бас гитара
- Зоран Трендов – соло гитара
- Стојан Велков – ритам гитара
- Џоко Ѓоргиев – тапан
- Димитар Бајрактаров – клавијатура
СКОПЈЕ
ДСМБУЦ „Илија Николовски Луј“
Ментор професор Марина Стојановска
- Јана Димовска
- Михаела Перевска
- Валентино Стојановски
- Магдалена Анѓеловска
СМУГС „ Д-р Панче Караѓозов“
Ментор професор – Лидија Пшенко
- Вероника Илиевска гитара, вокал
- Христина Милеусниќ вокал
- Верица Стојковска вокал
- Ивона Трпчевска гитара
- Марија Јанчева вокал со матрица
- Вероника – модерен балет / танц
СУГС „ Владо Тасевски“
- Александар Мишовски гитара
СПЕУГС „Васил Антевски Дрен
Ментор професор – Кристијан Стојановски
- Октај Далип – клавијатура
- Никола Стефковски – гитара
- Ребека Селмановска – виолина
- Стефан Трајкоски – гитара
- Марија Дуева – тапани
- Зорана Таневска – вокал
- Емилија Трајкоска – соло
Новинарски (видео – фото тим) и водителски тим
Ментор професор – Маја Миневска
- Петар + 2 – Михајло Пупин
- Димитар, Иван и Вероника– П.Караѓозов
- Еми – К.Рацин
- Дамјан Клинчаров – Орце Николов
