Епидемија на ситни и не баш ситни кражби во германските болници. Се крадат торби, мобилни, медицинска опрема, саксии со цвеќиња… и сè друго што е на дофат, а не е приковано за подот, покажува спроведеното истражување според кое штетите годишно достигнуваат и до милиони евра.
Во сојузната држава Северна Рајна-Вестфалија, на пример, во 2017-та се забележани речиси 6.500 случаи на кражби, покажуваат податоците на сојузното истражно биро.
Во Баден-Вуртемберг во југозападна Германија, во 2017-та е регистрирана рекордна штета од кражби од околу 2.75 милиони евра.
Проблемот, објаснуваат од истражното биро, е во големината на самите болнички комплекси и неконтролираниот пристап на посетителите, што им овозможува на лоповите многу простор и анонимност и слобода да роварат по фиоките и плакарите во празните соби. Болниците пак, балансирајќи меѓу отвореноста и безбедноста на пациентите, имаат ограничени можности за борба против оваа „епидемија“.
Здруженијата за заштита на пациенти бараат построги контроли на влезовите. Претседателот на едно од нив, Кристијан Зимерман, вели дека е неопходно посетителите да мора да се пријават и да пријават кого сакаат да посетат, а по потреба и да се идентификуваат.
