Маглата е многу карактеристична појава за овој убав период од годината, кога температурите се ниски, а влажноста на воздухот е исклучително висока. Го зголемува ризикот од сообраќајни незгоди и затоа се препорачува да го одложите возењето на ова време, особено ако не сте искусен возач. А ако патувањето е неодложно, овие совети ќе ви помогнат.
Направете го автомобилот видлив
Видливоста на автомобилот е најважна и одговорноста за тоа е исклучиво на возачот. И додека не можете само да ја промените бојата на автомобилот и да го направите повидлив во магла, лесно можете да ги вклучите светлата за магла. Таканаречените магленки светат со многу посилен интензитет од позициите или дневните светла, благодарение на што другите возачи полесно ќе ве забележат на патот.
Избегнувајте да користите долги светла
Возачите често користат долги светла во магла бидејќи мислат дека подобро го гледаат патот напред. Но, тоа е голема грешка. При густа магла, белото светло на фаровите само дополнително ја влошува видливоста, бидејќи светлината се „губи“ во капките вода што лебдат во воздухот. Во услови на намалена видливост на патот, можете да ги вклучите сите 4 трепкачи, за другите возачи да ве видат подобро.
Стаклата треба да бидат чисти
Нечистото ветробранско стакло, и надвор и внатре, дополнително ја намалува и онака слабата видливост на патот при возење во магла. Затоа внимавајте секогаш да има доволно течност за бришење на стаклата во автомобилот, како и крпи, со кои ќе го избришете стаклото одвнатре доколку е валкано или замаглено. Исто така, не користете го копчето за кружење на воздухот, бидејќи уште повеќе ги замаглува прозорците.
Држете се на растојание и почитувајте ги ограничувањата
Одржувањето на соодветно растојание на патот може да ви го спаси животот. Исто така, при возење во магла, возете со брзина која е приспособена на условите на патот и задолжително следете ги знаците поставени од двете страни на патот. Белите линии нацртани по должината на патот исто така може да ви дадат увид во тоа што всушност е видливоста, што може да биде корисно не само за ориентација, туку и за прилагодување на брзината.
