Општина Центар силно вложува во зеленилото и квалитетот на воздухот, порача денеска кандидатот за градоначалник на Центар од редовите на СДСМ и Коалицијата – Горан Герасимовски, најавувајќи интензивирање на зелената агенда на Центар.
„Нашата цел во Центар е не само преку новите паркови и јавните зелени површини да го зголемиме зеленилото, туку и ќе го подобриме квалитетот на воздухот. За таа цел ќе бидеме силно посветени и на субвенционирање на енергетско ефикасни фасади. Така не само што ќе го освежиме ликот на општината, туку ќе поттикнеме еколошко греење. Нашиот план е и поставување на фотоволтаични панели на покривите на јавните објекти и инвестирање во алтернативните извори на енергија. А преку вело-мрежата и затворање на ‘Боемска 2’ и ‘Орце Николов’, стимулираме зголемено користење на велосипеди и тротинети“, изјави Герасимовски.
Герасимовски посочи дека општина Центар и во изминатите четири години силно вложувала во ново зеленило. Општината за само четири години доби 5.200 садници и 53.700 м2 квадратни реконструирани паркови и преку ревидирање на 9 ДУП-ови заштити 14.000 м2 зеленило. Воедно општина Центар е првата општина која воведе обврска за 20% зеленило во градежна парцела и обезбедување задолжителни паркинг места за станарите, истакна Герасимовски. Тој додаде дека ова е сигурен доказ за плановите на СДСМ и дека Општина Центар ќе стане европска општина, со зелени паркови и зелени јавни површини.
„Време е тротоарите да ги ослободиме за велосипеди, мајки со колички, пешаци, време е да дишеме квалитетен воздух и да имаме зеленило каде ќе одмориме. Време е Центар да го заслужи својот вистински назив, затоа да гласаме за бројот 12, за Најдоброто за Центар“, порача Герасимовски.
