Варшава, 17 ноември 2022 (МИА) – Претседателот на Полска, Анджеј Дуда, денеска изјави дека Украина може да учествува во полско-американската истрага за инцидентот во селото Пржеводов единствено врз основа на меѓународното право.
„За да може да се зборува за учество во истрагата, мора да се применат соодветните прописи на меѓународното право. Ова е секогаш во опсегот на правната помош. Доколку гостите од Украина сакаат да видат како се води истрагата, може да им се покаже. Но, да учествуваат во истрагата, да добија пристап до документи, информации… за тоа се потребни конкретни основи според меѓународното право и договори“, истакна Дуда.
Во Пржеводов, во источна Полска, каде што на 15 ноември падна, како што се претпоставува, украинска ракета за противвоздушна одбрана, загинаа две лица, а Дуда го посети местото на несреќата и разговараше со семејствата на загинатите.
„Според нашето уверување и уверување на експертите, се случила несреќа, апсолутно ненамерна. Ракетата не била насочена кон Полска, не може да се гледа како напад врз Полска. Војна се води надвор од нашите граници. Русија истрела неколку стотици ракети врз Украина. Украина се бранеше, и тоа се случи“, наведе Дуда.
Тој додаде дека инцидентот во Пржеводов „на некој начин е заедничка полска и украинска трагедија“.
