Златниот прстен од римско време, за кој се верува дека го инспирирал британскиот автор Џ. Р. Р. Толкин да ги напише неговите познати романи „Хобит“ и „Господар на прстените“ наскоро ќе биде изложен во Англија.
Прстенот е пронајден во поле на југот на Англија во 1785 година, а се доведува во врска со римската табличка на која била испишана клетва за крадецот што ќе го украде.
Табличката била пронајдена кај храмот посветен на келтскиот бог Ноденс, во Глостершир, на западот на Англија.
Толкин во 1929 година работел на етимологијата на името Ноденс и неколку пати го посетил храмот. Како што пренесува „Associated Press“, изложбата во историскиот дворец Вајн, на југот на Англија, ќе ја прикаже историјата на прстенот, а посетителите ќе бидат повикани сами да донесат заклучок дали навистина се работи за фамозниот „прстен на Толкин“.
