Бајден разговараше со новинарите во Белата куќа откако израелските сили изминатиот викенд ги пронајдоа телата на шест заложници, меѓу кои и 23-годишниот Израелец роден во САД, Херш Голдберг-Полин
Американскиот претседател Џо Бајден денеска изјави дека е блиску до презентирање конечен предлог за договор за ослободување на заложниците кои Хамас ги држи во Газа, но додаде дека верува оти израелскиот премиер Бенјамин Нетанјаху не прави доволно за да гарантира таков договор.
Бајден разговараше со новинарите во Белата куќа откако израелските сили изминатиот викенд ги пронајдоа телата на шест заложници, меѓу кои и 23-годишниот Израелец роден во САД, Херш Голдберг-Полин. Нивните тела беа извлечени од тунел во Газа каде, како што беше соопштено, неодамна биле убиени од членови на палестинскиот Хамас.
Тоа предизвика критики за стратегијата на администрацијата на Бајден за прекин на огнот во Газа и го зголеми израелскиот притисок врз Нетанјаху да ги врати преостанатите заложници дома.
На прашањето дали мисли дека Нетанјаху прави доволно за да го обезбеди договорот за заложниците, Бајден одговори негативно, но не даде детали.
Запрашан дали планира да им претстави конечен договор за заложниците на двете страни оваа недела, Бајден рече:
„Блиску сме до тоа“.
На прашањето дали договорот ќе биде успешен, тој рече дека надежта е вечна.
Бајден и американската потпретседателка Камала Харис денеска треба да се сретнат со преговарачкиот тим на САД за договорот за заложниците и да разговараат со нив за напорите да се постигне договор за ослободување на преостанатите заробеници.
