Со претставата „Мојот маж“, Драмскиот театар-Скопје учествуваше во натпреварувачката програма на фестивалот на медитеранскиот театар „Пургаторије 2024“ во Тиват, Црна Гора. Претставата се одигра на Летната сцена во Тиват.
При претставувањето на годинашната програма на „Пургаторије“, Горан Божовиќ, директор на Центарот за култура во Тиват, истакна дека во програмската селекција на реномираниот театарски режисер и професор на Академијата на уметностите во Нови Сад, Борис Лијешевиќ, се наоѓаат десет претстави што со огромен успех се играат на своите матични сцени во Србија, Хрватска, Босна и Херцеговина, Македонија и Црна Гора. Од годинава организаторот најави дека покрај наградите за најдобра претстава, најдобра машка и женска улога, за актерско остварување и визуелна техничка иновација, се воведува и наградата за најдобра режија „Јагош Марковиќ“, во чест на починатиот театарски режисер што оставил длабока трага во театарската уметност во регионот.
Селекторот на фестивалот, Борис Лијешевиќ, истакна дека претставата „Мојот маж“, работена според колажот од расказите на Румена Бужаровска и авторските монолози, е претстава што говори за проблемите на брачната структура на Балканот каде што сѐ се менува. Тој вели: „Од фирми, продавници, држави, градови, сѐ се менува, единствено односот кон жената е непроменет“. Лијешевиќ потсети дека според книгата на Бужаровска се направени неколку претстави во продукции на театрите од регионот, но во селектирањето за фестивалот, тој се одлучил за претставата на Драмскиот театар од Скопје поради нејзината изворност и автентичност.
Режисерка на претставата „Мојот маж“ е Нела Витошевиќ, драматург е Викторија Рангелова-Петровска. Драматизацијата е на Нела Витошевиќ и Викторија Рангелова-Петровска. Костимографка е Роза Трајчевска Ристоска, сценограф е Костантин Трпеноски, а асистент-сценографка е Моника Ангелевска. Музиката е избор на Нела Витошевиќ. Улогите во претставата ги толкуваат актерите: Сара Климоска, Сања Арсовска, Емилија Мицевска, Наталија Теодосиева, Трајанка Илиева-Вељиќ, Игор Ангелов, Исмет Шабановиќ и Филип Трајковиќ.
Драмскиот театар-Скопје со оваа претстава имаше повеќе гостувања со извонреден прием кај публиката. Претставата се играше во Словенија, на сцената на „Местно гледалишче“ во Љубљана, во Црна Гора, на сцената на „Градско позориште“ во Подгорица, и минатата година на летната сцена на Бриони на хрватското издание на фестивалот „Рута“.
