Канадската компанија „Lucara Diamond Corp“ пронајде дијамант од 2.492 карати во својот рудник Карове во Боцвана, еден од најголемите ископани досега, соопшти компанијата во средата вечерта.
Компанијата не го откри квалитетот на скапоцениот камен, но неговата големина ќе го направи вториот по големина груб дијамант некогаш откриен, по 3.106-каратниот дијамант Кулинан пронајден во соседна Јужна Африка во 1905 година. По брусењето и полирањето, стана дел од скапоцените камења во британската круна.
Рудникот Карове е познат по производство на големи камења, со други значајни наоди, вклучувајќи ги дијамантите од 1.758 карати Севело и 1.109-каратниот дијамант Леседи Ла Рона.
Компанијата ќе му го презентира дијамантот на претседателот на Боцвана, Мокгвеци Масиси подоцна во четврток. Боцвана е водечки светски производител на дијаманти по вредност.
Јужноафриканската држава минатиот месец предложи закон со кој ќе се бара од рударските компании да продаваат 24 отсто од акциите во рудниците на локални инвеститори откако ќе добијат лиценца, освен ако владата не ја искористи својата опција да го купи уделот.
