Претседателката рече оти министерот за транспорт Александар Николоски ѝ ги образложил причините за законските измени и ѝ кажал дека без нив не ќе може да се префрлат средства на општините за реализација на значајни проекти
Претседателката Гордана Сиљановска-Давкова денеска најави дека ќе го потпише указот за прогласување на измените на Законот за урбанистичко планирање што беа изгласани на 13 август во Собранието.
![](https://365.com.mk/wp-content/uploads/2024/08/image-19-1024x683.png)
![](https://365.com.mk/wp-content/uploads/2024/08/image-19-1024x683.png)
Давкова изјави дека министерот за транспорт Александар Николоски ѝ ги образложил причините за законските измени и ѝ кажал дека без нив не ќе може да се префрлат средства на општините за реализација на значајни проекти. Нагласи дека зад законот има 64 пратеници.
„И во кампањата и во мојот инаугуративен говор реков дека ќе посегам по ветото, дека претходно ќе разговарам и со предлагачите и со пратениците. Разговарав со предлагачот, барав да ми ги образложи причините за скратната постапка, ми ги образложи, ги знаете причините. Вели дека е невозможно да се реализира помошта на општините доколку нема можност клучните објекти како училишта, градинки, гаражи, да се реалиизраат доколку не може да се префрлат средствата. Ми ги објасни овие измени како привремени или преодни. Рече дека е подоготвен веднаш да формира широка комисија од хетероген состав, вклучувајќи ги невладините организации во неа“,
рече Давкова.
Претседателката посочи дека секојдневно добива укажувања и од невладиниот сектор и дека секогаш ќе бара тој да се третира како партнер.
„Она што мене ме загрижува е следното. Значи, скратена беше постапката но исто така беа поканети како што можев да видам и релевантни претставници на невладиниот сектор за донесувањето на овој закон. Да бидам искрена јас сум за инклузивен модел и секогаш ќе барам да се почитува мислењето на невладиниот сектор и да се третира како партнер. Да не заборавиме дека законите ги носат пратениците, но она што мене ме збуни во случајов со овој закон е дека не видов ниту една дискусија на комисијата и на пленарната седница од пратениците од опозицијата“,
додаде Давкова.
Давкова очекувала да има амандмани за законот бидејќи, како што рече, секогаш невладините помагале со амандманите, но сега не биле поднесени.
„Јас и да го вратам законот, зад него има 64 пратеници, треба да има апсолутно мнозинство од 61 за да го потпишам. Ако немаше дискусии, ако немаше гласање против тогаш мислам дека ќе се повтори оваа ситуација. И затоа заклучувам, ќе го потпишам законот, мислам дека тоа треба да се направи денеска или утре“.
рече претседателката Давкова.
Собранието ги изгласа законските измени на 13. месецов, откако претходно истиот ден добија поддршка во матичната собраниска комисија, без амандмани и без дискусија од пратениците. Забелешки изнесоа претставници на „О2 иницијативата“, кои заедно со повеќе други невладини организации вчера апелираа претседателката да не го потпишува указот за Законот. Според нив, со измените на Законот за урбанистичко планирање ќе се носат застарени ДУП-ови чии параметри и мерења нема да одговараат на реалноста и ќе се уништува јавен простор.