Објавата на републиканците дојде набргу откако информативната веб-страница „Политико“ објави дека почнала да добива мејлови во јули од анонимен извор кој нуди автентични документи од персоналот на Трамп, вклучително и извештај за „потенцијалните ранливости“ на потпретседателскиот кандидат Џеј Ди Венс
Кампањата на Доналд Трамп за претседателските избори во САД вчера соопшти дека некои нејзини интерни комуникации биле хакирани и за тоа ја обвини, без да обезбеди директни докази, иранската влада, наведувајќи ги минатите непријателства меѓу Трамп и Иран.
Објавата на републиканците дојде набргу откако информативната веб-страница „Политико“ објави дека почнала да добива мејлови во јули од анонимен извор кој нуди автентични документи од персоналот на Трамп, вклучително и извештај за „потенцијалните ранливости“ на потпретседателскиот кандидат Џеј Ди Венс.
„Овие документи се незаконски добиени од странски извори кои се непријателски настроени кон Соединетите држави, со намера да ги нарушат изборите во 2024 година и да посеат хаос во нашиот демократски процес“,
рече портпаролот на кампањата на Трамп, Стивен Чеунг.
Доцна вчера, Трамп на својата социјална мрежа Truth Social објави дека Мајкрософт ја известил кампањата дека Иран хакирал една од неговите веб-страници.
Тој го обвини Иран, додавајќи дека тие можат да добијат само јавно достапни информации. Трамп не даде повеќе детали за хакирањето. Ројтерс не го потврди независно идентитетот на наводните хакери или нивната мотивација.
Кампањата на Трамп цитираше извештај од истражувачи на Мајкрософт во петокот во кој се вели дека хакери поврзани со иранската влада се обиделе да упаднат во сметката на „висок функционер“ за време на претседателската кампања на САД во јуни.
Хакери презеле сметка на поранешен политички советник и потоа ја користеле за да таргетираат функционери, се вели во извештајот.
Тој извештај не дава дополнителни детали за идентитетот на целите. Портпаролот на Мајкрософт одби да ги именува функционерите кои биле цел или да даде дополнителни детали по објавувањето на извештајот.
„Иран нема мотив да се меша во претседателските избори во САД“
Постојаната мисија на Иран во Обединетите нации во Њујорк соопшти дека иранската влада ниту поседува ниту има некаква намера или мотив да се меша во претседателските избори на Соединетите држави.
„Не им даваме никаква доверба на таквите извештаи“,
се додава во одговорот на наводите на кампањата на Трамп.
Во петокот, како одговор на откритијата на Мајкрософт, мисијата на Иран во ОН изјави за Ројтерс дека нејзините сајбер способности се одбранбени и пропорционални на заканите со кои се соочува и дека не планира да изврши сајбер напади.
