Да ги надминеме разликите, да се сплотиме околу итно започнување на преговорите, во спротивно ќе ги изгубиме младите кои се иселуваат. Потребни ни се европски реформи, кои ќе помогнат да го оствариме виталниот национален интерес, да ги мотивираме младите да останат во државава, порача претседателот на државата, Стево Пендаровски, на одбележувањето на 2 Август – Денот на Републиката – Илинден, во Меморијалниот центар на АСНОМ во Пелинце.
Пред присутните, Пендаровски посочи дека токму младите беа вистинските двигатели на двата Илиндена, клучни за трансформациите во државата, додека денес, како што рече, се загрозено малцинство.
„Со сегашното темпо на иселување, постои реална опасност многу бргу да ја достигнеме критичната демографска точка по која нема враќање. Доколку веднаш не му се застане на патот на овој опасен тренд и истиот не се успори со посветени политики и конкретна, во пракса реализирана стратегија за младите, нас нè очекува многу полоша иднина од онаа која во моментов ја антиципираме“, предупреди Пендаровски.
Зборувајќи за причините за иселувањето, Пендаровски рече дека младите заминуваат во туѓина бидејќи се отуѓени во државата. Од независноста наваму, рече, младите се пасивни приматели на политиките, нивната енергија се користи за теснопартиски цели и тие не веруваат дека може да се напредува со труд, туку со партиски книшки, роднински врски, етничка припадност наместо знаење и квалитет.
„Со тоа се отвора широка врата за корупцијата, а секоја коруптивна трансакција на пари и моќ воспоставува двојни стандарди, ја поништува еднаквоста пред законите, ја руши довербата во институциите и конечно, ја обезвреднува државата. Како најголем генератор на неправда и нееднаквост, корупцијата е една од главните причини за масовното иселување на младите. Иселувањето не е ништо друго освен конечен протест на младите генерации“, порача Пендаровски.
Шефот на државата истакна дека од АСНОМ, па до денес, се потврдува дека е тешко да се дојде до слободна држава, а уште потешко да се изгради и одржи слободно и праведно општество, кое, како што рече, е обврска на сите генерации.
Затоа потребни се европски реформи, а најбрз и најсигурен начин за суштински реформи, без бирократски импровизации и партиски и бизнис-махинации, се преговорите за членство во Европската Унија, порача тој.
Според него, интеграцијата ќе ја трансформира секоја општествена сфера, ќе овозможи градење на функционална правна држава со независен и ефикасен судски систем како предуслов за економски раст и одржлив развој.
„Преговорите ќе ни помогнат да ја направиме корупцијата помалку општествено прифатлива, а културата на неказнивост да ја замениме со култура на одговорност и личен, морален интегритет. При тоа, треба да ни е јасно дека добра алтернатива за европските реформи – не постои! Надворешните пречки не смеат да бидат алиби за забавување на реформите. Напротив, мора да го мобилизираме секој сегмент од општеството во искоренување на корупцијата, непотизмот и криминалот. Уште поважно, токму европските реформи ќе ни помогнат да го оствариме нашиот витален национален интерес, а тој е, да ги мотивираме младите да останат во државава и да се вклучат во изградбата на европска Македонија“, рече Пендаровски.
Тој повика да се надминат разликите, сите да се сплотат околу започнување на преговорите, за да не се изгубат младите, бидејќи без нивната енергија, како што рече, не е можно решавање на какви било прашања.
„Делчев со право бил против избрзано востание што ќе доведе до големо крвопролевање. Тој не се залагал само за слобода на македонската земја, туку за слобода и на македонскиот народ, бидејќи не сакал земја без народ. Ако поради преурането востание младата илинденска генерација беше безмалку десеткувана, денес, поради задоцнети европски реформи постои опасност нашата млада генерација да биде раселена“, рече Пендаровски.
Говорејќи за младите востаници, илинденците, асномците, тој подвлече дека тие го чествувале и Делчев и посветиле цело поглавје на младите, односно, дека историските извори сведочат дека младите се оние кои ја создадоа државата, се бореа за неа, предводеа револуции, демонстрации и дека поради борбата на млади антифашисти денес имаме држава.
„Затоа, денес, на ден Илинден, сеќавајќи се на трите македонски републики – Крушевската од 1903-та, АСНОМ-ската од 1944 и независната од 1991 година, треба да бидеме свесни дека само од нас зависи дали четвртата македонска република ќе биде европска или емигрантска. За век и векови да го славиме, честит Илинден на сите Македонци и македонски граѓани!“, заврши Пендаровски.
Извор: МИА
