Ако се потпише договор со Србија, ќе набавиме гас по најмалку три до четири пати пониски цени од берзанските, вели министерот за економија Крешник Бектеши, во гостувањето на „Топ Тема“ на ТВ „Телма“.
Бектеши посочи дека земјава преговара со „Србија гас“, а не со „Газпром“ и дека договорот за снабдување со природен гас го има српската страна. Како тоа технички ќе се спроведе – е нивна работа, вели министерот, додавајќи дека работа на македонската страна е да овозможи законски и технички услови, соодветни прописи и регулативи.
Бектеши потенцираше дека не се зборува за количини и за обезбедување суровини, туку преговорите се во фаза кога се зборува за цена – за тоа колку ќе ги чини граѓаните снабдувањето со природен гас.
„Преговорите се водат и се при крај. Доставивме понуда, експертските тимови работат за да се изнајде решение – ние да ѝ излеземе на Србија во пресрет за струјата, а тие нам за природниот гас. Ако има договор, во што сум убеден, зашто е работено повеќе од еден месец и јас секојдневно комуницирам со нивното Министерство за енергетика, цените ќе бидат многу пониски од цената на берзата, три до четири пати минимум ќе бидат пониски од берзанските. Во замена за тоа, ние Србија по попристојни цени ќе ја снабдуваме со електрична енергија“, рече Бектеши.
Министерот вели дека нема потреба тој да го чита договорот меѓу Србија и „Газпром“.
„Преговараме со ‘Србија гас’, а не со ‘Газпром’. Не ни треба да го прочитам договорот меѓу Србија и ‘Газпром’, а и тоа е деловна тајна. Наша обврска како држава е да го обезбедиме и технички и капацитетно барањето на Србија за електрична енергија, а обврска на српската Влада е како да ја снабдува Северна Македонија со природен гас“, подвлече Бектеши.
Тој истакна и дека парно ќе има и нема да биде на мазут, туку на гас, и ќе биде евтино. Земјава ќе ја одбере најприфатливата понуда од актуелните четири-пет, додаде министерот за економија.
Извор: МИА
