„Ние, претставниците на работничките станови кај Треска кои живееме на овој предел, револтирани сме што со години веќе никој не наоѓа решение за нашата безбедност. Не е прв пат да апелираме дека Треска е небезбедно место за живеење, каде многу често доаѓа до пожари, а неодамна испративме и известување до јавноста дека старата фабрика за мебел е еколошка темпирана бомба“, реагираат жители кај старата фабрика „Треска“ по повод денешниот пожар.
Велат дека повеќепати биле сведоци на палење на електрични кабли поради крадење на бакарот, што доведувало до бројни пожари и интервенции на Противпожарната служба, меѓутоа поради непристапноста на теренот последиците биле огромни.
„Секојдневно гледаме разбојништва во напуштениот индустриски капацитет и ‘Треска’ веќе одамна е прибежиште на крадци, бездомници и наркомани“, велат групата граѓани во реакцијата, додавајќи дека стравуваат за безбедноста на нивните животи и безбедноста на нивните деца, кои, како што велат, наместо да живеат во урбанизирана населба сред центарот на Скопје, во своите дворови гледаат наезди од инсекти, змии и стаорци.
„Практично од самото затворање на фабриката, оваа локација е потенцијална опасност не само за нас жителите, туку и за сите граѓани на Скопје, и бараме итно решавање на проблемот и конечно урбанизирање на овој дел од градот. Од нашето уставно загарантирано право на достоен живот нема да се откажеме, а денешниот пожар е само уште една потврда дека овде до овие рушевини повеќе не е безбедно да се живее“, се вели во реакцијата.
Жителите воедно и предупредуваат дека можни се нови експлозии и нови поголеми пожари. Нивните повици за урбанизација на оваа локација, велат, не доаѓаат само поради денешната катастрофа, туку поради сè понеподносливите услови за живот.
„Како и сите граѓани, и ние сакаме отворени прозори со свеж воздух и зеленило, а не смрдеа, страв од разбојници и живот на депонија“, се вели во реакцијата.
