Скопскиот градоначалник Петре Шилегов објави дека вечерва, во салата „Борис Трајковски“, се вакцинирал против ковид-19. Со тоа, како што вели, го остварил своето право, но и својата обврска.
„Само со масовна вакцинација, можеме заеднички да ја победиме оваа болест. Ве повикувам да го искористите своето право на вакцинација! Заедно да победиме!!!“, порачува Шилегов.
Тој додава дека особено задоволство му било што вакцината ја добил лично од Денис Јанкуловски, познат како Космонаутко (на чија иницијатива заиграа медицинските работници на песната „Вакцина“ на Дац и Александар).
„Не заигравме 😊, ама срдечно се поздравивме. Поздрав за сите прекрасни луѓе од медицинскиот и техничкиот персонал во Центарот“, додаде Шилегов, повторувајќи го апелот до граѓаните да се вакцинираат.
