Уште 30 дена притвор за Нефи Усеини и неговиот брат Ибро одреди охридскиот суд, откако вчера Основното јавно обвинителство Охрид поднесе обвинение против браќата за „насилство“ и побара продолжување на мерката притвор поради постоење опасност од нивно бегство.
Денешниот им е осми ден на браќата Усеини во притвор, откако сами се пријавија во затворот во Охрид по шест дена бегство од органите на прогонот, откако полицијата им поднесе кривична пријава за „насилство“ и „недозволено држење на оружје или распрскувачки материи” затоа што со пиштол го тепале охриѓанецот Спире Топалоски.
Во обвинението, меѓутоа, се товарат само за „насилство“.
„Основното јавно обвинителство Охрид денеска до Основниот суд Охрид поднесе Обвинителен предлог против две лица, браќа на возраст од 45 и 48 години, за кои постои основано сомнение дека како соизвршители го сториле кривичното дело – Насилство од член 386 став 3 во врска со став 1 од Кривичниот законик.
Обвинетите на 18 август 2020 година, околу 11.30 часот, по претходен договор извршиле грубо насилство врз едно лице при што во јавноста, кај присутни гости и вработени во хотелот Јуник во Охрид, предизвикале чувство на несигурност, загрозување и страв. Обвинетите го повикале оштетениот на средба во хотелот, па откако тој пристигнал со возило, на совозачкото седиште седнал еден од обвинетите. Веднаш започнале расправија, излегле од возилото кај паркингот пред хотелот, каде во меѓувреме пристигнал и вториот обвинет. Во тој момент, двајцата обвинети физички го нападнале оштетениот. При тоа, на еден од обвинетите од пантолоните му испаднал тврд предмет во облик на пиштол, кој потоа го зел вториот обвинет. Оштетениот со тупаници бил удиран во пределот на главата и телото пред влезот на хотелот и внатре, каде обвинетите во пределот на главата го удирале и со тврдиот предмет во облик на пиштол. По извршеното насилство со кое на оштетениот му биле нанесени телесни повреди, обвинетите го напуштиле местото на настанот“, соопшти вчера Обвинителството.
Во меѓувреме, браќата Усеини понудија и 30.000 евра гаранција за да бидат пуштени од притвор, која судот во Охрид ја прифати, но по жалба на Обвинителството, Апелациониот суд во Битола ја поништи одлуката.
