Јас одев на седумдневен одмор во Грција, а не како што вели Русковска дека сум сакал да побегнам. Тоа е ноторна лага. Ноторна лага е и тоа дека сум возел 200 на час и дека сум побегнал, рече Бојан Јовановски, откако неговиот адвокат Сашо Дуковски побара да му се укине затворскиот притвор на Јовановски.
– Мојата здравствена состојба стана шпанска серија, немојте судијке на мене да тренирате правда – рече Јовановски кој се обрати пред судечкиот совет барајќи притворот да му се замени со поблага мерка, односно со домашен притвор.
-Терапијата што ми ја препишаа лекарите не може јас да ја примам во затворската ќелија во која јас сум повеќе од седум месеци. Таму не ни примам терапија. А морам да кажам дека немам намера да побегнам. И не само ова, сметам дека е дискриминирачки тоа што немам формирано семејство да се зема предвид при одредувањето притвор – додаде Јовановски кој нашироко и објаснува на судијката зошто е неправедна мерката затворски притвор.
Тој веќе половина час ја уверува судијката дека ќе доаѓа на рочиштата, дека нема да бега и побара судечкиот совет да донесе правилна одлука.
Јовановски се пожали дека постојано има притисоци.
– Ако постапам како што постапи Кичеец и ако кажев дека Катица е виновна или дека Фросина земала пари ќе ме ослободеа – рече Јовановски.
На барањето на Дуковски да му се укине мерката притвор на Јовановски, но да му се определат сите други мерки на претпазливост, реагираше обвинителката Вилма Русковска.
– Полицијата не го најде обвинетиот во библиотека, го најде на граница при обид за бегство, затоа се противам на какво било размислување за укинување на притворот – рече Русковска.
Plusinfo.mk
